Tarjimai holi
Alisher Saʼdullayev 1994-yil 11-iyulda Jizzax viloyatining Jizzax tumanida pedagoglar oilasida tugʻilgan. Uning bolalik va maktab yillari ham aynan shu hududda oʻtgan. Dastlab Jizzax tumanidagi 31-sonli maktabda, keyinchalik esa Jizzax shahridagi 2-sonli umumtaʼlim maktabida tahsil olgan.
2017-yilda u Toshkent shahrida faoliyat yurituvchi Singapur menejmentni rivojlantirish institutini tamomlagan[1]. Talabalik davrida xorijiy tillarni chuqur oʻrganib, ingliz va rus tillarini erkin egallagan. 2015—2017-yillar oraligʻida Toshkentdagi “Result” oʻquv markaziga rahbarlik qilib, taʼlim sohasida boshqaruv tajribasini orttirgan[1].
2017-yilda “Kamolot” yoshlar ijtimoiy harakatining IV qurultoyida qilgan chiqishi uning keyingi faoliyatida muhim burilish boʻldi. Mazkur nutqdan soʻng Oʻzbekiston Prezidenti Shavkat Mirziyoyev tashabbusi bilan 2017-yil 30-iyunda Oʻzbekiston Respublikasi Xalq taʼlimi vazirligida yoshlar masalalari boʻyicha vazir oʻrinbosari etib tayinlandi[2]. Vazirlikdagi faoliyatidan soʻng, 2018-yilda Oʻzbekiston yoshlar ittifoqi raisining birinchi oʻrinbosari lavozimini egalladi[1][3], 2019-yil 29-avgustdan esa tashkilot raisi sifatida ish boshladi[4].
Yoshlar siyosatini rivojlantirishdagi faoliyati eʼtiborga olinib, 2020-yil 17-yanvarda Prezident farmoni bilan Oʻzbekiston Respublikasi Oliy Majlisi Senati aʼzosi etib tayinlandi[5][6]. Shu tariqa u mamlakat tarixidagi eng yosh senatorlardan biriga aylandi. 2020-yil 10-iyulda tashkil etilgan Yoshlar ishlari agentligiga direktor etib tayinlanib, davlat yoshlar siyosatini amalga oshirish jarayoniga rahbarlik qila boshladi[7]. 2021-yil 30-iyunda — Yoshlar kuni munosabati bilan — yoshlar bilan ishlash tizimidagi samarali faoliyati uchun Mehnat shuhrati ordeni bilan taqdirlandi[8].
2022-yil 24-maydan boshlab Oʻzbekiston shaxmat federatsiyasi raisi sifatida ham faoliyat yuritdi[9][10][11]. Shu yilning 20-dekabrida davlat boshqaruvi tizimini optimallashtirish doirasida mamlakatdagi vazirlik va idoralar soni qisqartirildi. Natijada Yoshlar ishlari agentligi yangi tashkil etilgan Yoshlar siyosati va sport vazirligi tarkibiga kiritildi, vazir etib Adham Ikromov tayinlandi[12]. Alisher Saʼdullayev esa asosiy lavozimlarini saqlagan holda vazirning birinchi oʻrinbosari lavozimini ham egalladi.
2024-yil yanvar oyida vazirlik tuzilmasi yana oʻzgartirilib, u Sport vazirligi sifatida qayta tashkil etildi, Yoshlar ishlari agentligi esa Oʻzbekiston Respublikasi Vazirlar Mahkamasi tasarrufiga oʻtkazildi[13]. Saʼdullayev agentlik direktori sifatida faoliyatini davom ettirdi.
2024-yil 4-oktyabr kuni Oʻzbekiston shaxmat federatsiyasining navbatdan tashqari yigʻilishida Abdulla Aripov federatsiya raisi etib saylandi[14]. Shu paytgacha mazkur lavozimda ishlab kelgan Alisher Saʼdullayev federatsiya raisining birinchi oʻrinbosari lavozimiga oʻtdi[15].
Faoliyati va loyihalari
„Result“ oʻquv markazi
2015—2017-yillar davomida Alisher Saʼdullayev “Result” oʻquv markaziga rahbarlik qilib, yoshlarning xorijiy tillarni oʻrganishi hamda chet davlatlarda taʼlim olish imkoniyatlarini kengaytirishga qaratilgan loyihalarni amalga oshirish bilan shugʻullangan.
Yoshlar ittifoqi
Alisher Saʼdullayev Oʻzbekiston yoshlar ittifoqi raisi lavozimiga tayinlangach, tashkilot faoliyatini yangicha tamoyillar asosida isloh qilishga kirishdi. Amalga oshirilgan muhim oʻzgarishlardan biri sifatida anʼanaviy aʼzolik tizimi bekor qilinib, mamlakatdagi barcha yoshlar avtomatik ravishda Yoshlar ittifoqi faoliyati doirasiga qamrab olindi[18]. Shuningdek, oliy taʼlim muassasalarida tahsil olayotgan iqtidorli talabalarni qoʻllab-quvvatlash maqsadida ularning kontrakt toʻlovining maʼlum qismi tashkilot tomonidan qoplab berilishi amaliyoti joriy etildi.
Uning rahbarligi davrida volontyorlik harakati alohida yoʻnalish sifatida rivojlantirildi. Natijada 2020-yilda COVID-19 pandemiyasi davrida 10 mingga yaqin koʻngilli yoshlar safarbar etilib, 500 mingdan ortiq fuqarolarga amaliy yordam koʻrsatildi[19]. Bundan tashqari, Sardoba suv omboridagi texnogen suv toshqini oqibatlarini bartaraf etishda ham volontyorlar keng jalb qilindi. Koʻngillilar faoliyatini ragʻbatlantirish maqsadida “Mehr-saxovat” koʻkrak nishoni taʼsis etildi[20].
Yoshlarning ijodiy salohiyatini qoʻllab-quvvatlash yoʻlida “Duel” nomli ijodiy tanlov yoʻlga qoʻyildi[21]. Kitobxonlik madaniyatini rivojlantirish maqsadida esa “Yosh kitobxon” respublika tanlovi keng ommalashtirildi va yoshlar orasida muntazam oʻtkaziladigan loyiha darajasiga olib chiqildi.
2019-yilda Alisher Saʼdullayev xalqaro maydonda ham chiqish qilib, Birlashgan Millatlar Tashkiloti minbarida Oʻzbekistonda amalga oshirilayotgan yoshlar siyosati hamda yoshlarga yaratilayotgan imkoniyatlar haqida nutq soʻzladi. Ushbu davrda Oʻzbekiston BMTning “Yoshlar strategiyasi — 2030” dasturini amalga oshirish boʻyicha jadal rivojlanayotgan mamlakatlardan biri sifatida eʼtirof etildi[22][22].
Yoshlar ishlari agentligi
