Shohjaxon o‘zining “Elektr energiya tejovchi” loyihasi uchun 60 million so‘m miqdorida grant sohibi bo‘lgan. Bugungi kunda ushbu loyiha amaliyotga joriy etilgan.
Shuningdek, nomzod Yoshlar ishlari agentligi tomonidan o‘tkazilgan “WikiStipendiya marafoni”da 2-o‘rinni qo‘lga kiritib, 40 million so‘m bilan rag‘batlantirilgan. Uning jamoaviy ilmiy loyihasi Favqulodda vaziyatlar vazirligi tomonidan 400 million so‘m miqdorida moliyalashtirilgan.
Bundan tashqari, “Yil talabasi – 2022” tanlovining respublika bosqichida “Yilning eng faol ixtirochi-innovator” talabasi nominatsiyasi bo‘yicha g‘oliblikni qo‘lga kiritgan.
Shohjaxon Sobirov O‘zbekiston Respublikasi Prezidenti huzuridagi Davlat xizmatini rivojlantirish agentligi huzuridagi “Kelajak liderlari” klubi a’zosi bo‘lib, davlatimiz rahbari Shavkat Mirziyoyevning Namangan viloyatiga tashriflari davomida o‘z takliflari bilan ishtirok etgan.
“WikiStipendiya marafoni” doirasidagi “Wikioromgoh” loyihasining 2-mavsumida “Eng yaxshi tahrirchi” nominatsiyasi g‘olibi sifatida taqdirlangan. Uning 7 ta loyihasi IT-Park Namangan viloyati filiali bilan hamkorlikda moliyalashtirilgan bo‘lib, hozirda yaratgan dasturlari Google Play Store platformasida sotuvda.
Shohjaxon Sobirov Namangan viloyati IT-Park tomonidan o‘tkazilgan “Ideathon” tanlovida 2-o‘rin sohibi bo‘lgan. U IT-Park tomonidan tashkil etilgan “Best startup project”, Innovatsion rivojlanish vazirligi tomonidan o‘tkazilgan “Mirzo Ulug‘bek vorislari”, Yoshlar ishlari agentligi, IT-Park va Innovatsion rivojlanish vazirligi tashabbusi bilan tashkil etilgan “O‘zbekiston uchun 100 g‘oya” tanlovlarida g‘olib sifatida e’tirof etilgan.
Shuningdek, u “O‘zbekiston yoshlari forumi – 2021”da yoshlar elchisi sifatida faol ishtirok etib, bildirgan takliflari Top-200 talikka kirgani uchun sertifikat bilan taqdirlangan.
Shohjaxon Sobirovning 20 dan ortiq ilmiy ishlari, 4 ta o‘quv-uslubiy qo‘llanmasi chop etilgan. U yaratgan 6 ta dastur uchun Adliya vazirligi tomonidan dasturiy guvohnomalar berilgan.
Ayni paytda u “WikiStipendiya” loyihasida mutaxassis sifatida faoliyat olib bormoqda. Shu kunga qadar o‘zbekcha Vikipediyada 2 500 ga yaqin maqola yozib, 95 mingdan ortiq materialni tahrir qilgan. Shuningdek, o‘zbekcha Vikipediyada interfeys administratori statusiga ega.
Nomzod faoliyati O‘zbekiston Milliy teleradiokompaniyasi tizimidagi “O‘zbekiston”, “O‘zbekiston 24”, “Yoshlar” telekanallari hamda yetakchi bosma nashrlarda keng yoritilgan.
